Sunnudagar eru góðir snúðadagar fyrir þessa dásamlegu Cinnabon snúða

Sunnudagar eru góðir snúðadagar. Við fengum Maríu Gomez matar- og heimilisbloggara til að deila með okkur einni af sinni uppáhalds snúða uppskrift en hún lumar á mörgum girnilegum snúða uppskriftum sem lokka bæði auga og munn. „Þessir dásamlegu Cinnabon snúðar hafa rækilega slegið í gegn hér á landi en uppskriftin af þeim er með þeim fyrstu sem birtust hér á landi,“ segir María. Það er óhætt er að segja að uppskriftin hafi farið víða enda eru þessir snúðar algjörlega ómótstæðilegir og ætti enginn að láta þá fram hjá sér fara.

Cinnabon snúðar að hætti Maríu Gomez

285 g mjólk eða (1 bolli)

125 g sykur eða (1/2 bolli)

30 g pressuger (fæst í kæli)

2 egg

80 g olía eða (1/3 bolli)

730 g af hveiti eða (4 1/2 bolli)

1 tsk. salt

Fylling

220 g af púðursykri eða (1 bolli)

2 1/2 msk. kanill

80 g smjör eða (1/3 bolli)

Rjómaostakremið

125 g rjómaost eða (1 dl)

60 g af mjúku smjöri eða (1/4 bolli)

260 g flórsykur eða (1 1/2 bolli)

1/2 tsk. vanilludropar eða vanillu extract

Snúðar

1. Byrjið á að setja volga mjólk, sykur og ger saman í hrærivélarskál og hrærið saman léttilega með sleikju. Látið standa í eins og 5 mínútur og takið tímann.
2. Setjið næst olíu og egg út í og hrærið saman með sleikju þar til vel blandað saman.
3. Bætið nú salti og hveiti út í og látið hnoðast með krókinum á vélinni deigið er til þegar það er búið að hringa sig utan um krókinn
4. Breiðið næst stykki yfir deigið og látið hefast í 30-40 mínútur á volgum stað (Má líka hefast lengur, alveg í nokkra tíma þess vegna).

Athugið að deigið hefast ekkert svakalega mikið og er frekar þungt í sér, svo ekki hafa áhyggjur af því. Á meðan deigið er að hefast er tilvalið að útbúa kremið og fyllinguna inn í snúðana.

Fylling

Mykið smjörið í örbylgju í eins og 20-30 sekúndur. Blandið því svo saman við kanilinn og púðursykurinn. Blandið vel saman.

Rjómaostakremið ofan

1. Hitið smjörið ögn í örbylgjunni til að mýkja það, ekki bræða það alveg heldur bara að það verði svona vel mjúkt
2. Hrærið svo saman smjörinu, rjómaostinum og vanilludropunum.
3. Setjið síðast sykurinn út í og hræri vel saman þar til silkimjúkt og kekkjalaust, líka ágætt að gera með handþeytaranum.

Næsta skref

1. Þegar deigið er búið að hefast er það flatt út í ferning. Ekki hafa hann of þunnan né stóran, best að hafa hann í þykkari kantinum, því þá verða snúðarnir meira djúsí.
2. Setjið svo fyllinguna vel yfir allt deigið.
3. Rúllið síðan deiginu upp í pulsu, og skerið í frekar þykka bita, eins og c.a 5 sentimetrar.
4. Raðið snúðunum í eldfast mót og hafið pínubil á milli svo þeir nái allir að bakast í gegn, þeir munu líka stækka og verða alveg klesstir saman.
5. Leyfið þeim að hefast undir stykki í svona 10 mínútur aftur ef vill, þarf samt ekki ef þið viljið sleppa því.
6. Bakið svo á 180 °C-190 C° bæstri í 15 mínútur. Snúðarnir eiga að vera gullinbrúnir þegar þeir koma úr ofninum frekar ljósir. Passið að baka ekki of mikið.
7. Setjið svo síðast rjómaostakremið á snúðana sjóðandi heita og berið fram heitt en það er langbest þannig.

Njótið vel.

María Gomez matar- og heimilisbloggari hjá paz.is