Til harðvítugra orðahnippinga hefur komið milli Jóns Gunnarssonar alþingismanns og stuðningsmanna Bjarkar Guðmundsdóttur út af því hvort hún greiði skatta á Íslandi eða ekki.
Alþingismaðurinn hélt því fram í vikunni að söngkonan greiddi ekki skatta á Íslandi af ofurtekjum sínum sem hún hefur aflað sér á undanförnum árum og áratugum sem visnæll tónlistarmaður á alþjóðavettvangi.
Faðir Bjarkar, Andri Snær Magnason rithöfundur og fleiri hafa brugðist ókvæða við og ráðist að Jóni Gunnarssyni með óbótaskömmum og krafist þess að hann dragi ummæli sín til baka og biðjist afsökunar. Guðmudnur Gunnarsson, faðir hennar, sagði umbúðalaust að dóttirin greiddi skatta á Íslandi og undir það tók hún sjálf með setningunni, “jú, ég borga skatta á Ísalndi.”
Gagnrýni Jóns Gunnarssonar á Björk gekk út á að hún gæti sífellt leyft sér að ráðast að íslenskum stjórnmálamönnum og væna þá um að vera “sveitalubbar” og að þeir vilji eyðileggja óspillta náttúru landsins. Björk hefur árum saman talið eðlilegt að koma heim til Íslands og hrauna yfir það fólk sem hefur reynt að byggja hér upp tekjuskapandi atvinnufyrirtæki, einkum á sviði orkuiðnaðar. Margir hafa bent á að það væri fremur billegt að leyfa sér slíkt án þess að deila kjörum með þjóðinni.
Þó Björk eigi íbúðarhúsnæði í vesturbæ Reykjavíkur, þá hefur hún að mestu búið og starfað erlendis síðustu ár og áratugi. Miklum sögum hefur farið af vinsældum hennar og árangri sem skilar miklum tekjum og auðæfum í hendur vinsælu listafólki af hennar tagi. Ætla má að hún hafi greitt skatta af alþjóðlegum viðskiptum sínum og tekjum í útlöndum. Alla vega hefur hennar ekki orðið vart á listum yfir tekjuháa Íslendinga sem eru mjög til umfjöllunar á hverju sumri. Aldrei hefur nafn hennar komið þar upp. Það bendir til þess að hún hafi ekki verið að greiða mikla skatta á Íslandi af tekjuöflun sinni á síðari árum og áratugum.
Líklegt er að Björk greiði lítilsháttar skatta af Stefgjöldum sem falla henni í skaut á Íslandi og hugsanlega er hún rukkuð um afnotagjald af RÚV, kr. 17,800, eins og allt sem hreyfist hér á landi. Slík skattlagning hefur alla vega ekki dugað til að hún hafi ratað inn á lista fjölmiðlanna sem birtir eru á hverju sumri við útkomu skattskráa. Fjölmiðlar hafa einmitt haft sérstakann áhuga á að beina kastljósi sínu að þeim Íslendingum sem eru hvað þekktastir hér á landi. Því er næsta ólíklegt að Björk Guðmundsdóttir hefði sloppið við þannig athygli ef hún hefði verið alvöru skattþegn hér á landi.
Frjáls verslun birtir á hverju sumri nöfn þúsunda Íslendinga og fjallar um tekjur þeirra. Síðast liðið sumar nam þessi fjöldi 3,725 skattgreiðendum. Sérstaklega var fjallað um listamenn. Nafn Bjarkar Guðmundsdóttir var ekki þar – frekar en á undanförnum árum. Enginn man eftir nafni hennar á slíkum listum fjölmiðalnna.
Sumarið 2015 birti Frjáls verslun m.a. upplýsingar um mánaðartekjur margra hljómlistarmanna frá árinu 2014. Þær upplýsingar byggðust á skattskýrslum þeirra. Meðal hljómlistarmanna á þeim lista voru Megas, efstur þeirra, með 1,4 m.kr. á mánuði árið 2014, Sigríður Beinteinsdóttir með 813 þús.kr., Páll Óskar með 667 þús.kr. á mánuði, Björgvin Halldórsson með 384 þús.kr., Ingólfur veðurguð með 294 og Andrea Gylfadóttir með kr. 133 þús. á mánuði árið 2014. En hvergi var minnst á Björk!
Það er ekki nema ein leið til að skera úr um þetta þrætuefni: Björk Guðmundsdóttir verður að birta álagningarseðil sinn frá sumrinu 2015 í fjölmiðlum þannig að allir geti séð hvort Jón Gunnarsson hafi haft hana fyrir rangri sök.
Hafi Jón ekki haft hana fyrir rangri sök, þá skuldar Björk og vinir hennar þingmanninum afsökunarbeiðni – sem hann hlyti að taka af ljúfmennsku svona í aðdraganda jólanna.
