Tónlistarkonan Ragnhildur Gísladóttir eða Ragga Gísla var gestur í útvarpsþættinumÍsland vaknar á K100 í morgun þar sem hún rifjaði upp bæði gamla og nýja tíma.
Hún sagði kvennasveitina Grýlurnar hafa gert allt vitlaust á níunda áratugnum og sagði meðal annars frá „hroðalegri sögu“ af sveitinni sem lenti í svaðilför sem endaði á forsíðum blaðanna á þeim tíma.
„Þetta var dálítið góður tími. Við vorum reyndar með alveg svakalega vont hljóð. Það er alveg hroðaleg saga þegar við fórum að spila í Eyjafirði. Við lentum í svaðilför og ætluðum ekki að geta lent af því að það var svo mikill snjór en svo kom gat í smá tíma. Rótararnir voru orðnir blindfullir þeir voru svo hræddir,“ segir Ragga.
Grýlurnar flugu á lítilli rellu þrátt fyrir að Fokker Icelandair hafi ekki flogið vegna óveðurs þann daginn.
„Það kom gat og við lendum og förum út í rútu. Nei – við keyrum á hest á leiðinni. Það kemur hjörð af hrossum á veginn og við keyrum á. Það þurfti að skjóta hann,“ sagði Ragga og vitnaði í þekkt lag Grýlanna þegar hún tók undir að þá hafi Sísí fyrst byrjað að fríka út.
„Við förum í félagsheimilið og spilum þar og það var ónýtt á eftir – þetta er hroðaleg saga en þetta er raunverulegt,“ sagði Ragga. „Allt brotið, allar rúður, klósettin og allt ónýtt. Það kemur bara í blöðin daginn eftir: Grýlurnar eyðilögðu félagsheimilið.“
Hægt er að horfa á viðtal K100 hér.
