Hjarta heimilisins slær iðulega í eldhúsinu og margir eiga sér draum að láta hanna draumaeldhúsið sem er aðsniðið þeirra þörfum. Erna Geirlaug Árnadóttir innanhússarkitekt hefur starfað við fagið frá árinu 1999 en á síðasta ári gerðist hún sjálfstætt starfandi undir eigin nafni. Hún hefur hannað fjöldan allan af eldhúsum undanfarið og elskar að hanna. Verkefnin hafa verið stór og smá, allt frá eldhúsum, baðherbergjum, vali á húsgögnum og allt yfir í heildarhönnun innanhúss með góðri útkomu.
Sjöfn Þórðar hittir Ernu Geirlaugu í einu af eldhúsunum sem hún hefur hannað í samráði við óskir húseigenda með góðri útkomu í þættinum Matur og Heimili í kvöld. „Notagildi, þarfir hvers og eins og auðvitað fagurfræðin,“segir Erna Geirlaug þegar Sjöfn spyr hana hvað hún hefur helst í huga þegar kemur að því að hanna draumaeldhúsið fyrir viðskiptavini sína. Við fáum innsýn í hönnun Ernu Geirlaugar og skemmtilegar lausnir þegar kemur að því að nýta rýmið til fulls og huga að fagurfræðinni um leið.
Áhugaverð heimsókn í hönnunnar eldhúsið eftir Ernu Geirlaugu í þættinum Matur og Heimili klukkan 20.00 og aftur klukkan 22.00 í kvöld.
