Náttúrulegar sápur sem bera heitið Baða Reykjavík er ávöxtur samstarfsverkefnis sem Bónus og Baða Reykjavík standa fyrir með það að leiðarljósi að framleiða umhverfisvænar og náttúrulegar gæða baðvörur á góðu verði sem innihalda hráefni sem fellur til í matvælaframreiðslu og í matvörubúðum og stuðla að samfélagslegri ábyrgð.
Baða Reykjavík er fyrst og fremst fjölskyldufyrirtæki í eigu hjónanna Erlu Gísladóttur og Ólafs Frímannssonar. Baða er nýtt vörumerki sem kom til út frá Uppsprettu, nýsköpunarsjóði Haga og hefur verið að vinna með URÐ á umhverfisvænan hátt en með Upprettu fengu hjónin tækifæri til að skapa nýtt vörumerki. Sjöfn Þórðar heimsækir Erlu á vinnustofuna þar sem gerð sápanna fer fram.
„Við fengum hér tækifæri til að nýta þá þekkingu sem við höfum í gegnum fyrirtækið okkar URÐ til að framleiða íslenska baðvörulínu fyrir dagvöruverslunina Bónus.“segir Erla en hún er einnig stofnandi og eigandi fyrirtækisins URÐ ásamt manni sínum sem er skapandi húð- og ilmvörufyrirtæki.
„Sápurnar okkar eru handgerðar eins og sápur voru gerðar í gamla daga með íslenskri repjuolíu. Sápurnar þurfa að taka sig í hillu í fjórar vikur áður en hægt er að nota þær. Þær innihalda engin aukaefni og aðeins hreinar ilmolíur,“segir Erla sem lærði sjálf að gera sápur á gamla mátann með því að afla sér þekkingar á netinu og prófa sig áfram með uppskriftum. „Við notum grænmeti og ávexti sem fellur til í verslunum, ýmist útlitsgölluð matavara, hefur orðið fyrir hnjaski eða komin fram yfir síðasta söludag.
Hér er á ferðinni verkefni sem er umhverfisvænt öðrum til eftirbreytni. „Baða er gríðarlega spennandi verkefni þar sem við höfum fengið aukið tækifæri til að sýna samfélagslega ábyrgð og sporna gegn matarsóun í samstarfi við Bónus og Haga,“segir Erla.
Missið ekki af áhugaverðri og skemmtilegri heimsókn Sjafnar til Erlu á vinnustofuna þar sem náttúrulegu sápurnar verða til í þættinum Matur og Heimili á Hringbraut í kvöld klukkan 19.00 og aftur klukkan 21.00.
