Margir halda mikið uppá túnfisksalat og það er hægt er að laga það með mörgum útfærslum. Hver með sínu nefi og brögðin geta verið margvísleg. Þetta tryllta túnfisksalat er að finna í smiðju Berglindar Hreiðars köku- og matarbloggara með meiru sem heldur úti síðunni Gotterí og gersemar og er að gera allt vitlaust þessa dagana.
„Á dögunum var mér sagt frá þessari frábæru hugmynd af túnfisksalati með eplum. Það var hún Dröfn hjá Hvíta húsinu sem sagði mér að tengdamamma sín gerði stundum svona salat og ég hreinlega gat ekki beðið með að prófa svona útfærslu. Ekki hefði mér dottið í hug að epli gæti komið svona hrikalega vel út í salati svo nú verður þetta nýja uppáhaldið mitt, það er alveg á hreinu,“segir Berglind sem er alveg að missa sig yfir bragðinu sem kemur með eplunum. Hér kemur uppskriftin sem mun gleðja bragðlaukana.
Túnfisksalat með eplum
7 egg
2 dósir túnfiskur í vatni (2 x 185 g)
½ laukur
1 grænt epli
1 msk. sítrónusafi
240 g Hellmann‘s majónes
Aromat og pipar
- Harðsjóðið eggin, kælið, skerið smátt niður og setjið í stóra skál.
- Pressið vatnið af túnfisknum og setjið í sömu skál og eggin.
- Næst má saxa laukinn og eplið smátt niður (flysjið eplið fyrst), kreista sítrónusafann yfir og setja síðan í skálina.
- Að lokum fer majónesið saman við og öllu blandað varlega saman með sleif og kryddað eftir smekk.
- Geymið í kæli fram að notkun og berið fram með góðu kexi eða brauði.
„Ég saxaði eplið frekar smátt niður en þið getið að sjálfsögðu stýrt stærðinni á bitnum á því sem og lauknum eftir því sem ykkur finnst best. Ég er svolítið mikill saxari oft á tíðum og vill oftast hafa allt mjög smátt saxað.“
Hægt er að borða túnfísksalatið ofan á kex, snittubrauð eða jafnvel ofan á eplasneiðar./Ljósmyndir Berglind Hreiðars.
