Lína Móey, eiginkona fjallgöngumannsins Johns Snorra Sigurjónssonar, segir að enn sé svigrúm fyrir kraftaverk. Ekkert hefur spurst til Johns Snorra og tveggja félaga hans, Muhammad Ali Sadpara og Juan Pablo Mohr, síðan á föstudag en þremenningarnir voru þá nálægt tindi K2, næsthæsta fjalls heims.
Umfangsmikil leit hefur staðið yfir undanfarna daga en enn sem komið er hefur hún verið árangurslaus. Áfram verður leitað í dag og eru líkur taldar á að C-130 herflugvélar verði notaðar við leitina en þær geta komist mun hærra en þær þyrlur sem hafa verið notaðar við leitina hingað til.
Lína Móey sagði á Facebook-síðu sinni í gærkvöldi:
„Í hjarta mínu er hann kraftaverk og kemur hann til baka. Ég er ekki búin að gefast upp og veit að það er enn svigrúm fyrir kraftaverk því vikan er ekki liðin, búðirnar hans munu standa til laugardags. Þeir sem þekkja John Snorra vita yfir hvaða styrk hann býr og vona ég að
fleiri þarna úti veiti mér byr undir þá vængi að reyna þar til er fullreynt,“ segir hún.