Matarflóran blómstrar sem aldrei fyrr víðs vegar um landið og í Hveragerði er að finna huggulegt veitingahús þar sem smurbrauðið fer með aðalhlutverkið ásamt girnilegum aðalréttum og eftirréttum. Hér um að ræða veitingastaðinn Matkrána sem er í eigu tveggja reynslumikilla veitingamanna þeirra Guðmundar Guðjónssonar og Jakobs Jakobssonar sem stofnuðu og ráku hið virta og margrómaða veitingahús Jómfrúna í Reykjavík í um það bil tuttugu ár í miklum blóma.
Sjöfn Þórðar heimsækir Guðmund og Jakob á Matkránna og fær innsýn í það sem þeir eru að gera á Matkránni. Þeir Guðmundur og Jakob eru fluttir í sveitina og njóta þess að nýta afurðir og uppskeru úr nærumhverfinu í matargerð sína og bakstur. Þeir seldu Jómfrúnna fyrir nokkrum árum og eftir fjögurra ára hlé í veitingabransanum, sumarið 2019, ákváðu þeir að byrja að nýju með því að innrétta og hanna veitingahús, Matkrána í hjarta blómabæjarins Hveragerðis.
„Matkráin er veitinga- og kaffihús með norrænar áherslur í mat og drykk. Einnig gætir skandinavískra áhrifa í innréttingum og eflaust líka í þeirri stemningu sem hér ríkir,“segja þeir Guðmundur og Jakob sem vita fátt skemmtilegra en að gleðja viðskiptavini sína með ljúffengum kræsingum og góðri þjónustulund.
Kræsingarnar sem þeir framreiða eru hver annarri girnilegri og hágæða hráefni í forgrunni. Hér er Portúgalinn.
Smurbrauðs- og matargerð þeirra er byggð á norrænum hefðum úr íslensku gæðahráefni. Það má með sanni segja að Guðmundur og Jakob hafi síðast liðin 25 árin verið ötulir við að kynna ekki síst danskar hefðir í mat og drykk saman ber rauðsprettu á brauði, purusteik, jólaplattann fræga að ógleymdri hinni heilugu þrenningu: smurbrauð, öl og snaps.
Heimareyktur lax borinn fram með kornhænueggjum og piparrótardressingu.
En þeir lumma á fleiri leyndardómum og blómstrar nú sem aldrei fyrr í matargerðinni og framreiðslu á nýjungum sem verða til heima í eldhúsinu þeirra í sveitinni. Sjöfn fær þá til svipta hulunni af nokkrum þeirra.
Meira um leyndardóma Matkrárinnar í þættinum Matur og Heimili með Sjöfn Þórðar í kvöld klukkan 19.00 og aftur klukkan 21.00 á Hringbraut.
