Eftir helgarmatinn þar sem við leyfum okkur aðeins meira í sælkerakræsingum og eftirréttum er fiskur kjörinn í kvöldverð á mánudegi. Hér er komin frábær uppskrift af ljúffengum laxarétti úr smiðju Berglindar Hreiðars köku- og matarbloggara hjá Gotteri og gersemar.
„Lax er í uppáhaldi þegar kemur að fiski hjá mörgum hér í fjölskyldunni, já eða allur bleikur fiskur eins og stelpurnar mínar og þá er þessi tilvalinn,“ segir Berglind.
Þennan rétt er bæði fljótlegt og einfalt að elda og bera fram.
Lax í rjómasósu með sólþurrkuðum tómötum
Fyrir um 4 manns
- 4 laxabitar (um 800 g)
- 2 rifin hvítlauksrif
- 150 g Sacla sólþurrkaðir tómatar
- 150 g Sacla grillaðar paprikur
- 400 ml rjómi
- 1 msk. Sacla Fiery Chilli Pestó
- 60 g spínat
- 30 g rifinn parmesan + meira til að rífa yfir
- 20 g smjör
- Ólífuolía
- Salt og pipar
- Skolið og þerrið laxinn.
- Bræðið smjörið og setjið smá ólífuolíu saman við á háum hita.
- Steikið laxinn í um 3-4 mínútur á hvorri hlið svo hann verði stökkur að utan og eldaður að innan, saltið og piprið og færið síðan yfir á disk og lækkið hitann á pönnunni.
- Setjið hvítlauk, grillaðar paprikur og sólþurrkaða tómata (gott að taka þá í tvennt ef þeir eru mjög stórir, sama á við um paprikuna) á pönnuna og steikið stutta sund, bætið við olíu eftir þörfum.
- Hellið rjómanum yfir og hrærið Pestóið saman við, kryddið aðeins til eftir smekk.
- Bætið þá parmesanosti saman við sósuna og hrærið þar til hann bráðnar og bætið að lokum spínatinu saman við.
- Leyfið þessu að malla í um tvær mínútur, bætið þá laxinum aftur á pönnuna og berið fram með kartöflum, kartöfluklöttum eða öðru sem hugurinn girnist.
Girnilegur þessi laxaréttur./Ljósmyndir Berglind Hreiðars.
