Pétur Maack sálfræðingur segir að það sé „merkileg frétt og mikið framfaraskref“ að til standi að skima alla unglinga á landinu fyrir þunglyndi og kvíða. Þar með sé þó aðeins fyrsta skref stigið. Fylgja verði slíkri skimun eftir og það kosti peninga.
„Merkileg frétt og mikið framfaraskref ef rétt verður haldið á málum. Skimun og, eftir atvikum, greining er þó tilgangslaus ef henni fylgir ekki meðferð. Aðgengileg niðurgreidd sálfræðiþjónusta ásamt fullri viðveru á heilsugæslustöðvum verður að fylgja í pakkanum,“ skrifar sálfræðingurinn á fésbók.
Fram hefur komið í Morgunblaðinu að undanfarin ár hafi 9. bekkingar í Breiðholti verið skimaðir fyrir kvíða og þunglyndi og í kjölfarið hafi sumum þeirra verið boðið á námskeið í hugrænni atferlismeðferð. Það hafi leitt til þess að tilvísunum um greiningar hafi fækkað um 50%.
Geðheilbrigðismál hafa verið töluvert í umræðunni í vikunni og þá ekki síst vandi ungmenna. Sjálfur hefur Kristján Þór Júlíusson heilbrigðisráðherra látið hafa það eftir sér að geðheilbrigðismál hafi setið á hakanum.
