Elenora Rós Georgesdóttir er aðeins 19 ára gömul og hefur þegar gefið út sína fyrstu uppskriftarbók sem ber heitið Bakað með Elenoru Rós sem hefur hlotið verðskuldaða athygli og er á metsölulista Eymundsson um þessar mundir. Hún er bakaranemi með mikla og einlæga ástríðu fyrir bakstri og starfar hjá Bláa lóninu við bakstur. „Ég hef elskað að baka frá því að ég man eftir mér og hef fengið að blómstra á þessu sviði,“ segir Elenora Rós sem þegar hefur brætt hjörtu landsmanna með útgeislun sinni og uppskriftum.
Jólastelpa sem elskar jólabakstur
„Ég elska fátt jafn mikið og jólin. Ég á reyndar afmæli á Þorláksmessu svo ég er ekta jólabarn. En burt séð frá því þá elska ég skreytingarnar, hefðirnar, baksturinn, snjóinn og allt sem jólunum fylgir. Kannski er það vegna þess að ég ólst upp við mikla jólastemningu en ég er ávallt pínulítil jólastelpa í hjarta mínu sem elskar jólabaksturinn og allt sem honum fylgir.“
Enginn var svikinn af þættinum Matur og heimili á mánudagskvöldið á Hringbraut þegar Elenora sýndi hvernig maður bakar jólabollakökur sem allir geta gert. „Þessar bollakökur eru samblanda af lagtertu og piparköku en innblásturinn af þeim kom frá því. Brún lagterta og piparkökur einkenna svo sannarlega jólin mín og því fannst mér tilvalið að setja þetta saman í nýjan búning en samt á þann hátt að allir geti gert þetta.“
Elenora Rós Georgesdóttir og Sjöfn Þórðar í þættinum Matur og Heimili.
Jólabollakökur Elenoru Rós
460 g sykur
460 g hveiti
10 g negull
10 g engifer
10 g kardimommuduft
10 g kanill
230 g kakó
5 g matarsódi
5 g lyftiduft
2 egg
115 ml Olio Nitti ólífuolía
230 ml mjólk
230 ml heitt vatn
Aðferð:
- Forhitið ofninn í 170°C hita.
- Hrærið öllu vel saman þar til deigið verður silkimjúkt og glansandi, skafið niður hliðarnar ef þess þarf.
- Setjið deigið í bollakökuform og bakið þær í u.þ.b 20 mínútur.
- Leyfið þeim að kólna alveg.
Kanilkrem
250 g smjör
250 g flórsykur
10 ml rjómi
15 g kanill
Aðferð:
- Þeytið smjör þar til það er létt og ljóst.
- Bætið rjóma, flórsykri og kanil saman við og þeytið vel og lengi þar til kremið verður silkimjúkt og létt.
- Setjið kremið í sprautupoka og sprautið því á bollakökurnar og skreytið fallega með jólalegu ívafi.
Gleðilega aðventu og njótið vel.
