Svanhildur Nanna Vigfúsdóttir, stjórnarformaður VÍS, afhjúpar sig algjörlega í viðtali við Markaðinn á Fréttablaðinu í dag. Hún reynir þar að svara fyrir það ástand sem hún og félagar hennar eru ábyrg fyrir innan VÍS sem margir telja að eigi eftir að stórskaða félagið og valda hluthöfum þess ómældu tjóni.
Svanhildur Nanna er þekkt fyrir hroka og frekju í mannlegum samskiptum. Yfirleitt ríkir ekki friður í kringum hana og margir í viðskiptalífinu hafa allan vara á gagnvart þeim hjónum sem hafa verið nokkuð áberandi í fjárfestingum eftir að þau auðguðust á býsna vafasömum viðskiptum með hlutabréf í Skeljungi fyrir nokkrum árum. Um þau viðskipti var fjallað ítarlega í viðskiptablaði Morgunblaðsins á sínum tíma. Eftir það sem fram kom í þeirri umfjöllun áttu flestir von á því að Íslandsbanki léti reyna á það sem þar fór fram fyrir dómstólum. Bankinn lét það hins vegar ógert sem verður að teljast einkennilegt.
Hjónin Svanhildur Nanna og Guðmundur Þórðarson hafa fjárfest í VÍS og ráða yfir um 20% eignarhlut í félaginu ásamt samstarfsmönnum sínum sem eru meðal annarra Sigurður Bollason, Andri Gunnarsson og Gestur Gestsson. Lífeyrissjóðir og sjóðir tengdir þeim hafa hins vegar átt um 50% hlut í félaginu. Þeir hafa ekki gætt nægilega vel að því að tryggja kosningu á farsælum meirihluta í stjórn félagsins og því hefur Svanhildur Nanna og félagar komist upp með hálfgert “valdarán” í VÍS. Þau ráða þar öllu í krafti 20% hlutar, hafa meirihluta stjórnar, formann og eru búin að hrekja forstjóra félagsins í burtu og ráða annan sem hefur ekki viðskiptalegan bakgrunn heldur tryggingarstærðfræðilegan bakgrunn. Flest bendir til að stjórnin ætli að láta nýja forstjórann fást við að reikna út tryggingaráhættur en láta aðra sjá um að stýra eignasafni VÍS.
Eignastýring á bótasjóðum vátryggingarfélaga er annar af óumdeildum meginþáttum starfsemi þeirra. Ef stjórn eða eigendur leyfa sér að seilast í stjórnun bótasjóða, þá eru menn komnir út á hálan ís. Sporin ættu að hræða frá því fyrir hrun þegar þetta gerðist því miður á Íslandi með skelfilegum afleiðingum. Dapurlegasta dæmið um það er hvernig til tókst hjá Sjóvá undir forystu Karls Wernerssonar. Flestir ættu að muna hvernig það endaði.
Í viðtalinu við Markaðinn leyfir Svanhildur Nanna sér að tala með niðrandi hætti um Herdísi Fjeldsted, sem studd var til setu í stjórn VÍS af stærsta hluthafanum og gegndi formennsku í félaginu. Svanhildur segir um hana: ”........... við vanmátum gamla varðhundinn sem gætti valdahagsmuna á kostnað arðsemissjónarmiða.”
Bíðum nú aðeins við! Hvað var Svanhildur Nanna að gera þegar hún ruddist í formannssæti stjórnar VÍS gegn vilja meginþorra hluthafa, studd af einungis 20% hlutafjár? Var hún að gæta heildarhagsmuna? Nei. Hún var einungis í eigin valdabraski og sveifst einskis. Hver segir að hennar stefna gæti betur að arðsemi en stefna þeirra sem vilja fara varlegar og gæta að lögum, reglum og góðum stjórnarháttum í hvívetna?
Svanhildur Nanna sýnir hroka og hortugheit í anda þess sem tíðkaðist hjá nokkrum hópi fólks fyrir hrun. Sem viðgegst hjá því fólki sem fór svo mikinn og gekk svo óvarlega um gleðinnar dyr í viðskiptum og fjárfestingum að Ísland féll fram af brúninni. Hrunið hefur kostað almenning í landinu ómældan sársauka sem við viljum ekki upplifa aftur.
Þess vegna er mikilvægt að eftirlitsaðilar fylgist vel með ófyrirleitnu fólki í viðskiptum og stöðvi það áður en of mikill skaði hlýst af. Hvar er Fjármálaeftirlitið núna? Er FME ekki að fylgjast grant með þeim hjónum og liðinu í kringum þau. Ekki bara í VÍS, sem er eftirlitsskylt fyrirtæki, heldur einnig í Kviku banka þar sem þau eru hluthafar. VÍS á einnig 25% hlut í Kviku banka.
Hvernig skyldi viðskiptavinum Kviku banka og öðrum hluthöfum bankans líða þegar fólk af þessu tagi gerir sig gildandi með því hugarfari sem einkennist af ófyrirleitni? Þeim ætti ekki að líða neitt betur en öðrum hluthöfum VÍS og viðskiptavinum félagsins en þeim hlýtur öllum að líða illa. Enda er fararsnið á þeim mörgum.
Dramb er falli næst. Svanhildur Nanna er lítil í sér en virðist ætla að bæta það upp með hortugheitum og hroka.
Litlir karlar ná ekki langt. Sama gildir um litlar kerlingar sem nötra af hortugheitum og frekju.
rtá
