Á miðstjórnarfundi Sjálfstæðisflokksins sl. föstudag biðu fundarmenn spenntir eftir því að Hanna Birna stigi fram og tilkynnti að hún gæfi ekki kost á sér til áframhaldandi starfa sem varaformaður flokksins. Hún sagði ekkert um það og enginn þorði að spyrja. Það voru mikil vonbrigði og óvissa heldur því áfram.
Fundurinn var tíðindalaus, ekki var tekist á um stóru málin en þeim mun meira rætt um skelfilega fjárhagsstöðu flokksins.
Ólöf Nordal er tilbúin að taka við varaformennsku að nýju ef það getur orðið án átaka. Hún ætlar hvorki í kosningaslag við Hönnu Birnu né Guðlaug Þór.
Bjarni Benediktsson hefur lagt að Hönnu Birnu að draga sig í hlé frá varaformennskunni á landsfundi eftir 2 mánuði. Hún falbýður samkomulag um það í skiptum fyrir aðra tign í flokknum. Hún er föl ef vel verður boðið.
Samkvæmt heimildum Náttfara vill Hanna Birna komast inn í ríkisstjórnina að nýju og mun hafa bent á veika stöðu Illuga Gunnarssonar sem yrði þá að vîkja fyrir henni. Hún mun hafa boðið Bjarna að hverfa úr varaformennskunni með góðu, bjóðist henni ráðherradómur að nýju.
Bjarni verður að gera upp hug sinn sem fyrst því annars stefnir í óefni.
