Gunnar Hrafn Jónsson, blaðamaður og fyrrverandi þingmaður Pírata, rifjar upp kynni sín af Condolezza Rice, fyrrverandi þjóðaröryggisráðgjafa George Bush yngri Bandaríkjaforseta, á Facebook.
Þar deilir hann tísti þar sem segir að „satíran sé dauð“ eftir að Rice lét þau ummæli falla í viðtali á Fox News að „þegar þú ræðst inn í fullvalda þjóð, þá er það stríðsglæpur.“ Slíkt gerði stjórn Bush er hún ákvað að ráðast inni í Írak 2003 án samþykkis Sameinuðu þjóðanna og í mikilli andstöðu við vilja flestra ríkja heims.
„Aldrei á ævinni hef ég upplifað verri útgeislan frá manneskju en þegar ég hitti hana. Mér leið eins og ég starði í augun á hákarli þegar hún lýsti því hvernig hún gæti með símtali látið sprengja hvaða "hættu" sem er á Íslandi á innan við klukkutíma,“ skrifar Gunnar Hrafn.
