Guðmundur Gunnarsson, fyrrverandi formaður Rafiðnaðarsambandsins kveðst gáttaður á framkomu fulltrúa orkufyrirtækjanna á fundi Rammaáætlunar á miðvikudag, en þar hafi þeir talað niður til fólks sem vill láta náttúruna njóta vafans.
Þeir hafi beint orðum sínum sérstaklega að þessu fólki sem \"er á móti öllum virkjunum á hálendinu og kýs að verja öllum sínum frítíma í þá baráttu“ svo vitnað sé í framkvæmdastjóra Samorku. Hann kveðst hins vegar ekki vilja hafa eftir ummæli talsmanns Landsvirkjunar, en almennt mætti segja um fulltrúa þessara aðila að þeir krefjist þess að \"þetta fólk\" komi ekki nálægt störfum í rammaáætlunarverkefninu.
\"Mér og mörgum í salnum var fullkomlega óskiljanlegt hvernig starfsmenn orkufyrirtækjanna töluðu. Orkufyrirtækin eru í eigu landsmanna og eru framkvæmdaaðilar, ekki ákvörðunaraðilar. Það er ekki hlutverk starfsmanna orkufyrirtækjanna að gera tilraunir til þess að þvinga í gegn auknum virkjunum og ýta til hliðar sjónarmiðum sem þeim þóknast ekki. Þeim ber að vera hlutlausir hvað varðar staðarval, þannig er unnið í nágrannalöndum okkar,\" skrifar Guðmundur á vef Herðubreiðar í gær og er misboðið.
Hann bendir á þjóðarvilja: \"Í skoðanakönnunum hefur komið fram að yfir 80% landsmanna eru hlynntir náttúruvernd þeir ætlast til mikils af störfum rammaáætlunar. Ástæða er að halda því til haga að í dag gilda allt önnur sjónarmið en voru ráðandi um síðustu aldamót þegar rammaáætlunarverkefninu var hrundið af stað. Þá snérust verkefni rammaætlunar einungis um virkjanakosti. Hver virkjun var metin sem sjálfstæð eining, en ekki stórbrotnar landslagsheildir eins og væri eðlilegt.\"
Og hann minnir á staðreyndir dagsins: \"Í dag dregur íslensk náttúra hinsvegar hingað gríðarlegan fjölda ferðamanna, sem skapar í dag mun meiri gjaldeyristekjur en stóriðja og útgerð. Gjaldeyristekjur vegna hennar stefna í vel yfir 400 milljarðar króna á ári. Til samanburðar þá eru gjaldeyristekjurnar af sjávarútveginum rúmir 240 milljarðar og heildartekjur allrar stóriðju í landinu er um 230 milljarðar. Ferðaþjónustan er orðin miklu stærri hér á landi en öll álver, kísilver og járnblendi saman lögð.\"
Hann segir víðerni á Íslandi hafa minnkað um nærri 70% á árunum 1936 til 2010 samkvæmt nýlegri rannsókn við Háskóla Íslands. Sérstæð og fjölbreytileg náttúra sé aðal aðdráttarafl landsins, en um 88% erlendra ferðamanna komi til landsins vegna hennar og um helmingur þeirra komi hingað vegna öræfanna: \" Stjórnendur og starfsmenn Landsvirkjunar og Samorku eiga ekki að ákveða hvort og hvar eigi að virkja. Það er hins vegar þeirra að virkja á sem hagkvæmastan hátt á þeim stað sem ákveðið hefur verið í samræmi við landslög og settar leikreglur og sjá um rekstur virkjunarinnar og sölu á framleiðslu hennar,\" skrifar Guðmundur á vef Herðubreiðar eftir fund Rammaáætlunar.
