Hvers virði er illska sem hamslaus í hjörtunum brennur
hjá huglausu fólki sem níðir þann eina sem kvelst?
Hvers virði er tárið sem kalt niður kinnina rennur
er kyrrþeyrinn sýnir þær myndir sem óttumst við helst?
Er til meiri vesæld en hópur sem hæðist að einum
og hefur það markmið að ráðast á fallega sál?
Hver þráir að fylla sitt hjarta af hatri og meinum
og hugsa með stolti um ömurleg eineltismál?
Hvern langar að vera í fangelsi þrúgandi þagnar
og þola nær daglega grimmlyndi, hæðni og níð?
Hvern langar í gremju sem óttinn í myrkrinu magnar
er máttvana hugur vill hjálp sem er indæl og blíð?
Hvers virði er drengur sem öskrar á einmana hjarta
og elur í brjósti sér grimmd sem í hatur er þyrst?
Hvers virði er gæskan og samviskan sæla og bjarta
ef sjáum við ungling sem þráir að deyja sem fyrst?
Hvers virði er stelpa sem helst vill með hatrinu meiða
og hlær einsog skepna að sál sem er bitur og meyr?
Hvers virði er lífið ef ótta við náum að eyða
hjá ástlausu barni sem hangir í snöru og deyr?
