Leikkonan Edda Björgvinsdóttir hefur ákveðið að láta gott af sér leiða og flytja út á land, að minnsta kosti tímabundið.
Edda greinir frá því á Facebook að hún hafi skráð sig sem sjálfboðaliða í bakvarðarsveit fyrir hjúkrunarheimilið Lund á Hellu.
Edda segir í færslunni að hún hafi í raun aldrei verið hraustari og mun hún dvelja á Stracta-hótelinu á Hellu næstu dagana, en þar býr hluti af fjölskyldu hennar.
„Ég nálgast engan. Jú einu sinni á dag hitti ég elsku göngugarpinn dóttur mína og við þrömmum með tveggja metra millibili okkar daglega göngutúr. Ég tók ekkert ruslfæði með mér og er að kafna úr monti,“ segir Edda og bætir við að hún þurfi að vera í „lofttæmdum plastpoka“ áður en hún má koma inn á hjúkrunarheimilið til að vera með þeim viðkvæma hópi sem þar dvelur.
Af færslu Eddu að dæma verður ekki annað séð en að hún sé full tilhlökkunar.
„Jóga, göngur og hollt fæði ... ég SKAL halda þetta út!,“ segir hún. Þeir sem umgangast Eddu reglulega gætu orðið varir við breytingar á henni þegar hún kemur heim. „Ég held að þegar ég mæti til Reykjavíkur eftir laaaaanga dvöl í vernduðu umhverfi og hollustu - þá verði ég hrukkulaus gyðja með þykkt liðað hár niðrí mitti og 50 kíló ... MEÐ lífrænu snyrtibuddunni minni!!!“
