Albert Eiríksson matar- og sælkerabloggari og Berglind Guðmundsdóttir hjá Gulur, rauður, grænn og salt verða hjá Sjöfn Þórðar í jólaþætti þáttarins Matur & Heimili á mánudagskvöld:
Það má með sanni segja að árið sem senn er að líða hafi verið fordæmalaust og ólíkt því sem við eigum að venjast. Í jólaþætti þáttarins Matur og Heimili fær Sjöfn Þórðar þáttastjórnandi til sín góða gesti og býður þeim til hátíðarkvöldverðar og spjalls á Grillmarkaðinum þar sem árið verður gert upp. Albert Eiríksson matar- og sælkerabloggari með meiru ásamt Berglindi Guðmundsdóttur gleðigjafa hjá Gulur, rauður, grænn og salt verða gestir Sjafnar og það skal engan undra að þau munu fara á kostum. Hrefna Rósa Sætran matreiðslumeistari og sjónvarpskokkur og Guðlaugur P. Frímannsson matreiðslumeistari framreiða glæsilega þriggja rétta jólamáltíð fyrir gestina að hætti Grillmarkaðarins meðan árið er gert upp.
Bjargey Ingólfsdóttir stíllisti og lífsstílsbloggari sá um að dekka hátíðarborðið fyrir jólaþáttinn í ár.
Nýja jólakúlan sem umlykur hefðirnar og siðina
Farið verður yfir sviðið, vítt og breitt þegar kemur að matarvenjum og auknum stundum Íslendinga í eldhúsinu á þessu herrans ári, framkvæmdagleðina innan sem utan dyra og nýjar hefðir og siði í tengslum við jólahátíðina. „Jólin verða róleg og notaleg með mínum í ár,“segir Berglind og hlakkar til kósí stunda með börnunum sínum. Albert tekur undir í sama streng: „Við Bergþór verðum með okkar jólakúlu og eldum okkar uppáhalds jólamat.“ Þátturinn verður með hátíðarívafi þar sem Albert og Berglind munu svipta hulunni af jólamatseðlinum sínum í ár og hvernig þeim líst á nýju jólakúluna.
Þátturinn Matur og Heimili er sýndur alla mánudaga á Hringbraut klukkan 20.30 og aftur klukkan 22.30.
